كلية المرعبين 2013

 هو استثمار جيد للشخصيات والبيئة اللي خلقتها بيكسار من 12 سنة ... مؤلفين الجزء الجديد مختلفين بما فيهم المخرج والتيمة زي معظم افلام ديزني هي الاختلاف وتحقيق الذات للواد المضطهد مايك (كورتي البعبع ) كمان الذكاء في اختيار بيئة الكلية اللي ممكن تناسب الاطفال اللي اتفرجوا على الجزء الاول في اول ماعرض وعلى وشك الالتحاق بالكلية وده بيخلق توحد اكتر مع الشخصيات بس لمراحل عمرية اكبر واكثر تعدد ولكن بمقارنته بالجزء الاول الفيلم جيد فقط لاغير ...

 

 سينما امريكانا بلازا يادوب تلبس النضارة عشان الصورة تتحسن انما ولا ثري دي ولا حاجة .والسينما كان معظمها فوق ال 20 سنة !!

بيكسار كالعادة قدمت قبل الفيلم فيلم قصير بعنوان المظلة الزرقاء هوه في رأيي بمثابة تدريب او استعراض للتطور في المحاكاة اللي لما هتشوفه مش هتصدق انه انيميشن الا بعد فترة ...انما قصة مفيش .

 

بالمناسبة التيزرز والاعلانات اللي نزلت قبل الفيلم مالهاش اي وجود ف الفيلم وكانت مجرد قفشات مخصوصة للدعاية .

 

 

ورجعنا تاني

بعد ما البلوج راح مني ...قررت ارجعه واكتب ...عن الافلام اللي شفتها وبشوفها ...عن الافلام اللي عملتها ونفسي اعملها ...هكتب واللي يقرا يقرا ...هكتب للكتابة نفسها...هعمل نفسي دليل للمساء والسهرة ...حد فاكر لوحات الاعلانات بتاعة زمان اللي احيانا زرقا والكتابة عليها بالابيض وكان اللي شايلها ايده تهتز او تبان قبل ما الكاميرا تقطع ...حد يوعى على الرول بتاع الاعلانات اللي كانت بتلف بمنفلة وتمللي مزيكا عمر خيرت بتاعة العرافة والعطور الساحرة شغالة ... حد فاكر يافطة اضف الى مكتبتك هذا الكتاب الجديد وبعدها اعلان مجلة الاذاعة والتليفزيون او كتاب الهلال  او مجلة حريتي وكان فيه كمان حاجة اسمها عقيدتي ...يااااااااه ده احنا طلعنا قدام قوي :( ...اعتراف مالوش لزمة جه على بالي ... انا من اللي كنت بيصرخوا ويعيطوا لما تيجي موسيقى برنامج العلم والايمان :) هههههههه
خبر سعيد بالنسبة ليا ... انا خلصت ترجمة فيلمي ( جميلة والوحش ) وان شاء الله اشارك بيه في مهرجان قريب ...دعواتكم .

كواليس الفيلم مع البطلة ( رضوى عادل ) هتبقى ممثلة كويسة لو عقلت او عاشت اصلا :)

حاجات غريبة

اللي كنت بتتمناه ولسه.. مالاكش نفس تعمله... الكسل يتطرق الى حك الانف...واليأس كدبة وسبب للخوض ف بعض المحظورات بحجة الترويح... الناس هم مشكلتي في الحياة ... الة الزمن خيال بحت لاصلة له بالعلم لان ببساطة لو عملوها مش هيبقى فيه مشكلة تاني... التفكير كثيرا ما يكون اكبر نقمة وابتلاء خصوصا قبل النوم... الوحدة هي الشيء الوحيد الذي يعاود الاتصال بي يوميا... الخوف كل الخوف من تبادل هذا الاتصال ... القلب بندول نظام الععد التنازلي لمغادرة هذه الدنيا...الدنيا تتلخص احيانا في شعور طفل في ملجأ فقير للايتام اجبرته ادارة الدار على متابعة برنامج الفائز ابي ...على سبيل الترفية..

احساس بالامل والكسل

امبارح سهرت بعد السحور قلت افكر شوية ف المشروع اللي بحلم بيه...الفيلم الروائي الطويل .... الافكار شدت بعض وسرحت ف كل جنب لدرجة اني بقيت حاسس ان حد بيمليني ...الموضوع فتح وانا يادوب لسه ف طور التفكير ...اومال لما اتنيل على عيني واكتب هيحصل ايه...المهم على قد ما انا متحمس وفخور بالمستوى على قد ما انا محبط من نفسي وحاسس حاجة بيني وبين الكتابة..ده انا حتى الكتب اللي مت عشان الالقيها مكسل اقراها..والتدريب بتاع تفريغ فيلم من الشاشة للورق نفسي اعمله...وعاوز اتفرج على كام فيلم جامدين جداد وقدام ...كل ده ومش عارف انا بعمل ايه ووقتي بيضيع ف ايه من غير ما استفاد باي حاجة ...الفيلم القصير اتعمل بعد عناء توهان ف مجاهل حلوان ومابعدها وانقطاع النور والمية عن اللوكيشن حتى العاشرة مساءا واختلاف النجمين بطلين العمل علاء ومنة واختلاف مدير الانتاج مع طنط ام المخرجة ( المنتجة كما اكتشفت ) لانهم اوردرهم من خمسة لخمسة واحنا ماخلصناش غير نص الفيلم الذي لاتتجاوز مدتة العشر دقائق... قلبنا الليلة وخلصنا 8 الصبح ولاحس ولا خبر غير رسالة شكرجماعي لعلاء واحنا بنفطر ف المنيل...المهم اللي اتصور كان حوالين السيناريو اللي كاتبه العبد لله...يارب بس ماينسوش يكتبوا اسمي...او...الفيلم يولع ف المونتاج :)

مشروع سيناريو لفيلم قصير ..لعبة الثلاث سطور

والله انا نيتي خير لان اللي جه لعلاء عشان يشارك فيه تحت مسمى مجازي انه سيناريو فيه فكرة حلوة وانا بعرف اعالج الافكار لو عجبتني..ظبطتنا القوام امبارح مع المخرجة والاخ صاحب القصة وناقص اعمل السيناريو واقدمه الاربعاء عشان نصور الجمعة ان شاء الله...ده لو تم ان شاء الله هيبقى اول عمل يتلطع اسمي الكريم عليه ...سيناريو وحوار ... ومش هحرق الفكرة الواو بس هدي هينتات كده بسيطة زي ...شيطان...جنس ...مخدرات ... اطمنوا مش هيجي الوقت اللي احمد ربنا على توفيقي ف عمل فيلم بورنو يمتع الجمهور..

inception وما ادراك ماهو انسبشن

اخيرا رحت الفيلم بعد عناء لاء وايه مع علاء ومنة اينعم هوه كان على حساب ساعات نومي التي تقلصت لساعتين بس الفيلم يستحق ...ده واحد سينمائي صايع طلب ميزانية خرافية وخدها بس ماضيعهاش ...بس كاد ان تفلت منه... فكريستوفر نولان مخرج ومؤلف الفيلم ببساطة نسي ان اغلبية الجمهور والمصري بالذات .قد .حلقت ابراج عقولهم بحمامهم حاملة البيض الذي فقس من الرتابة والسطحية ...وراح واخد الناس على مشمهم لدرجة ان البعض حس انه بيتسحل وبيتجرجر على وشه من الرتم اللذي اخذ في التصاعد بمبرر ومن غير مبرر احيانا ...الفكر جامدة بس التفاصيل الكتير كادت ان تسخفها , محمد خان كان عنده حق لما قال جرع الابهار زياده وتحليل عمرو سلامة صح مية بالمية ...قال كل اللي ف نفسه ومخافش الناس تستطول النقد... عقبالنا
انا عملت التمرين المطلوب بمعاونة النجمين اللي كانوا معايا امبارح.. والنتيجة فوق الجيد ...والنهاردة اخر يوم ف مرحلة الكورس الاولى ....هانت

انت لازم تعارض على كل حاجة ؟!

ف محاضرة الاخراج امبارح قفشت مع دكتور احمد عواض (مخرج فيلم كتكوت واريد خلعا وكلم ماما ) ...بصراحة ماكانش قفش انا كنت بسأل ف حاجة مرت ف دماغي تحتمل الصح والغلط بس هوه مابياخدش باله انه بيدمر نفسية السائل ايا كان لما يبتسم باستهكام وتترسم على شفتيه وعيونه الشبه ناعسة ابتسامة بتقول ( ده انت بطيخة وقرعة)
المشكلة ان الحس الفكاهي درجات بين الناس وانا دايما بذيع على الموجة القصيرة ... :) ظروف بقى
المهم لما حبيت الطف الجو معاه عكيته اكتر ولما استشهدت بالناس باعوني وكدت ان البسها لوحدي ... بس اتلمت وخلاصة الموضوع ان انا كده وده مؤشر هايل التنين ... لاني بعارض بامانة وليس لغرض المعارضة ولاني اقبل التصحيح ولا اخجل من الاسف للخطأ مادام عفوي.
المهم مطلوب تمارين تصوير ودي بداية المسيرة ...ادعولي